MANUFAR RAYUWAR AURE A ADDINI DA WAYEWAR ZAMANI.
Rayuwa ba manufa, rayuwa ce marar ɗanɗano. Matukar ma’aurata sun haɗu a kan manufa ɗaya za su rayu ne a kan wannan manufar, amma in aka yi rashin dace, yadda miji yake kallon al’amura da bambanci da nahiyar da ita take kallo, toh! a nan tushen saɓanin yake. In dai manufa kuwa za ta bambanta hanyoyin isa ga manufar ma za su bambanta. A wannan yanayi, sabani da cin karo zai dabaibaye zamantakewar aure, saboda ba a kan manufa ɗaya ake tafiya ba. duk kammalallen mutum yana samun nasara ne saboda ɗabi’ar tsayuwa a kan manufa. A cikin manufar samar da ɗan Adam za mu iya fahimtar gamammiyar manufar aure.
Ma’aurata ku sani, manufarku ta farko ta kasance zaman ibada da neman yardar Allah, ba al’ada ba. Akwai keɓantacciyar manufar aure nau’ika biyu; Asliyyah; Kiyaye wanzuwar jinsin ɗan Adam. Sai kuma Taba’iyya sauran manufofi da mutum ya ƙudura a ransa a matsayin manufar da ta motsa shi ya yi aure; haihuwa, kamewa daga sha’awa, biyan buƙatar ɗabi’a, godewa ni’imar Allah, rayuwar taimakekeniya, sanyaya zuciya da ɗebe kewa da ma kyakkyawar manufa ta al’adun mutane tsaftattu.
Ma’auratan da suka gina zamantakewar aurensu a kan manufa ingantacciya sun fi kusa da jin tsoron Allah wajen kulawa da haƙƙoƙin junansu, kuma aure ya fi albarka.
Duba:
1. Al-Maqaasidul Aammah Lis shari’atil Islamiyyah na Dr. Yusuf Hamid Al-Aalim sh393
2. The 5 Love Languages; The Secret of Love That Lasts na Gary Chapman.
Domin sanin yadda mutun yake da ruhi ba da jiki a danna nan
